10 metrlik jarlik ichidagi changalzorga tushib ketgan ikki kishi qutqarildi

Kecha, 4 may kuni soat 23:15 da Samarqand viloyati FVBga «112» tizimi orqali Samarqand shahar «Ipak yo‘li» MFY hududida 10 metrlik jarlik ichidagi changalzorga 2 nafar fuqaro tushib ketganligi va ularga amaliy yordam zarurligi bo‘yicha xabar kelib tushgan.

Mazkur xabarga asosan, aytilgan manzilga zudlik bilan FVB qutqaruvchilari yetib kelishgan. Qutqaruvchilarning tezkor harakatlari natijasida 2 nafar fuqaro sog‘-salomat qutqarib olingan.

Ma’lum bo‘lishicha, fuqarolar yoshi ulug‘ insonlar bo‘lib, dastlab 1 nafari jarlikka tushib ketgan, so‘ng sherigini qutqarish maqsadida ikkinchi fuqaro ham tushib qaytib chiqmagan.