Mers AQShning Ukrainada Rossiya urushini tugatishdagi asosiy rolini ta’kidladi

Fridrix Mers Germaniya federal kansleri sifatidagi ilk xorijiy safari chog‘ida Fransiya prezidenti Emmanuel Makron bilan Ukrainadagi vaziyatni tinch yo‘l bilan hal qilish masalalarini muhokama qildi. Mers 7 may, chorshanba kuni Parijda «AQSh tomonidan keyingi siyosiy majburiyatsiz urushni tugatish mumkin emas» dedi. Unga ko‘ra, yevropaliklar AQSh rolini almashtira olmaydi.

Boshqa narsalar qatorida, Qo‘shma Shtatlar Ukraina va Rossiya o‘rtasida o‘t ochishni to‘xtatish to‘g‘risidagi bitim yoki tinchlik shartnomasini tuzish uchun kafolatlar berishda ishtirok etishi kerak, deya ta’kidladi Mers. Uning so‘zlariga ko‘ra, yevropaliklar Ukrainada tinch yo‘l bilan tartibga solishni ta’minlashga o‘z hissalarini qo‘shishga tayyor, ammo bunda amerikaliklar ham ishtirok etishi kerak.

AQSh prezidenti Donald Tramp «urushga barham berishga kelganda bizning to‘liq qo‘llab-quvvatlovimizga ishonishi mumkin», dedi Germaniyaning yangi hukumat rahbari. Tomonlar o‘t ochishni to‘xtatish bo‘yicha kelishuvga erishgandan so‘ng, Germaniya «AQSh rahbarligida va ishtirokida» unga rioya etilishini kuzatishda ishtirok etishga tayyor», dedi u. Vashington, shuningdek, NATO va Ukraina oldidagi o‘z majburiyatlarini bajarishda davom etishi kerak, deya qo‘shimcha qildi kansler.