Eron uranni boyitishni taqiqlashni «qizil chiziq» deb atadi

Eron tashqi ishlar vaziri Abbos Aroqchiy mamlakat uranni boyitishda davom etish uchun ruxsat so‘ramasligini aytdi. U AQSh tomonidan Eronga qo‘yilgan tinch yadroviy dasturdan voz kechish talabini shunday izohladi.

«Ushbu taklifda juda ko‘p noaniqlik bor, bu maktubda ko‘plab savollar tushunarsiz. Biz yaqin bir necha kun ichida tegishli javob beramiz. Hududimizda uran boyitish masalasi «qizil chiziq». Bu haqiqat, menimcha, barcha davlatlar tushunib yetdi», dedi Abbos Aroqchiy jurnalistlarga.

AQSh prezidenti Donald Tramp bir kun avval yadroviy dastur bo‘yicha potensial kelishuv Eronda uranni boyitishni istisno qilishini aytdi. Reuters agentligining eronlik diplomatga tayanib xabar berishicha, Eron bu kelishuvni rad etadi, chunki bu Tehronni tinch yadroviy dasturga ega bo‘lish huquqidan mahrum qiladi. Shu fonda ushbu masala bo‘yicha AQSh-Eron muzokaralarining oltinchi raundi barbod bo‘lishi mumkin, deb xabar berdi CNN.