Yevroittifoq Ukraina uchun agromahsulotlar importini yengillashtiradi

Yevrokomissiya Ukraina bilan Yevropa Ittifoqi va Ukraina o‘rtasidagi chuqur va keng qamrovli erkin savdo hududini qayta ko‘rib chiqish bo‘yicha muzokaralarni yakunladi, bu haqda 30 iyun, dushanba kuni Bryusselda savdo va iqtisodiy xavfsizlik bo‘yicha Yevropa komissari Marosh Shefchovich hamda qishloq xo‘jaligi va oziq-ovqat bo‘yicha Yevropa komissari Kristof Xansen e’lon qildi.

Tomonlar Assotsiatsiya bitimi doirasida savdoni liberallashtirish bo‘yicha qoidalarni qayta ko‘rib chiqish bo‘yicha prinsipial kelishuvga erishdi. Bu qadam Ukrainaning Yevropa Ittifoqiga qo‘shilishi kontekstida «uzoq muddatli va oldindan taxmin qilinadigan o‘zaro hamkorlik doirasini yaratishda yangi bosqichni anglatadi», dedi Shefchovich. Uning ta’kidlashicha, kelishuv «ayrim qishloq xo‘jaligi tarmoqlarining sezgirligini to‘liq hisobga oladi, u Yevropa Ittifoqiga a’zo davlatlar va fermerlar tomonidan qayd etilgan». «Kelishuv muvozanatli, adolatli va realdir, u og‘ir geosiyosiy sharoitlarda ehtimoliy eng yaxshi natijani ifodalaydi», deb ta’kidladi Marosh Shefchovich.

Texnik tafsilotlar hozircha oshkor etilmagan, deydi rasmiylar Bryusseldagi brifingda, ammo 6 iyundan beri amalda bo‘lgan urushdan oldingi kvotalar bilan solishtirganda, ukrainalik ishlab chiqaruvchilar uchun sharoitlar yaxshilangan. Shunday qilib, Bryussel va Kiyev bir qator mahsulotlar, jumladan, quruq sut, sut mahsulotlari, qo‘ziqorinlar, uzum sharbati va boshqalar bo‘yicha savdoni to‘liq erkinlashtirishga kelishib oldi, deya DW muxbirining savoliga javob berdi Yevropa komissari Xansen.

Aksariyat qishloq xo‘jaligi mahsulotlari uchun joriy kvotalar so‘nggi yillardagi eng yuqori savdo darajasiga ko‘tariladi, dedi u. Bunga, masalan, sariyog‘, quruq sut, solod, glyuten, jo‘xori va arpa yormalari kiradi.

Tuxum, shakar va bug‘doy kabi «sezgir mahsulotlar» uchun kvotalar ko‘payadi, ammo tarixiy savdo hajmidan past bo‘ladi. Ushbu toifadagi tovarlar uchun import butun blok yoki alohida davlatlar darajasida «jiddiy qiyinchiliklarga» olib kelmasligi uchun Yevropa Ittifoqining himoya mexanizmlari amalda bo‘ladi, dedi Shefchovich. Nisbatan kamroq sezgir mahsulotlar uchun kvotalar «o‘rtacha miqdorda» oshiriladi.

O‘z navbatida, Ukraina parranda go‘shti, shakar uchun kvotalarni oshiradi, shuningdek, boshqa tovarlarga import bojlarini kamaytiradi yoki bekor qiladi, deydi Yevrokomissiyadagilar. Bu Yevropa Ittifoqi mamlakatlari uchun eksport imkoniyatlarini oshirishga yordam beradi.