Ayrim sohalarda mehnat shartnomalari elektron shaklga o‘tadi

Xodimlari soni 50 nafargacha bo‘lgan kafe-restoranlar va boshqa xizmat ko‘rsatish kompaniyalari, shuningdek, qishloq xo‘jaligi va qurilish sohasidagi ish beruvchilar xodimlar bilan Face-ID orqali elektron shartnoma tuzishi va bekor qilishi mumkin bo‘ladi. Mehnat qonunchiligi buzilgan holatlarni ish beruvchi ishtirokisiz ko‘rib chiqish va elektron shaklda ma’muriy qaror qabul qilish yo‘lga qo‘yiladi.

Foto: Unsplash

“Mehnat munosabatlari va kasbga tayyorlash tizimini takomillashtirish hamda ish beruvchilarni rag‘batlantirishga oid qo‘shimcha chora-tadbirlar to‘g‘risida”gi prezident farmoni qabul qilindi.

Farmonga ko‘ra, 2025 yil 1 sentabrdan e’tiboran:

xodimlari 50 nafargacha bo‘lgan xizmat ko‘rsatish, qishloq xo‘jaligi va qurilish sohasidagi xo‘jalik yurituvchi sub’yektlarga yagona milliy mehnat tizimi (YaMMT)da biometrik identifikatsiya qilish (Face-ID) orqali elektron mehnat shartnomalarini tuzish va bekor qilishni rasmiylashtirishga ruxsat beriladi;
davlat mehnat inspektorlari tomonidan o‘tkaziladigan tekshiruvlar haqida vakolatli organni oldindan xabardor qilish tartibi bekor qilinadi;
“Xavfni tahlil etish” tizimining tahlil natijalariga asosan o‘tkaziladigan tekshiruvlarning boshlanishi haqida kamida 10 ish kuni oldin tadbirkorni xabardor qilish tartibi davlat mehnat inspektorlari tomonidan o‘tkaziladigan tekshiruvlarga tatbiq etilmaydi.

2026 yil 1 yanvardan e’tiboran, YaMMT orqali qayd etilgan mehnat qonunchiligi buzilishini ish beruvchi ishtirokisiz ko‘rib chiqish va qonunbuzilishi holatlari bo‘yicha elektron ma’muriy qaror qabul qilish tizimi joriy etiladi.