O‘zbekistonda uy-joy sotib olishda keshbek joriy etilishi mumkin

O‘zbekistonda uy-joy sotib olishda keshbek joriy etish masalasi ko‘rib chiqilyapti. Bu haqda 29 avgust kuni Savdo-sanoat palatasi tomonidan qurilish sohasi vakillari bilan tashkil etilgan ochiq muloqotda ma’lum qilindi.

Savdo-sanoat palatasi raisi Davron Vahobov ko‘chmas mulk QQSni hisobga olgan holda sotib olinishi kerakligini ta’kidladi. Uning so‘zlariga ko‘ra, uy-joylarning atigi 10 foizga yaqini qo‘shilgan qiymat solig‘i bilan, qolgan 90 foizi esa soliqsiz sotib olinyapti.

«Jismoniy shaxslar uchun 4−5 foiz keshbek joriy etish bo‘yicha fikrlar bor, shunda ular quruvchiga murojaat qilib, oldi-sotdi bitimi summasidan 5−6 foiz keshbek olish uchun hisobvaraq-fakturani talab qilishadi. Balki bu vaziyatni o‘zgartirishga yordam berar?» — dedi Vahobov.

Avvalroq, O‘zbekistonda uy-joy oldi-sotdisini amalga oshirishda naqd puldan voz kechish rejalashtirilayotgani xabar qilingandi. Soliq qo‘mitasi raisining birinchi o‘rinbosari Mubin Mirzayevga ko‘ra, bu yashirin iqtisodiyotga qarshi kurashishga qaratilgan.