AQSh YeIni sanksiyalar evaziga Rossiya gazidan voz kechishga chaqirdi

Yevropa davlatlari Vashingtondan Moskvaga qarshi sanksiyalarni kuchaytirishni istasa, Rossiya neft va gazini sotib olishni to‘xtatishi kerak. Bu haqda 8 sentabr, dushanba kuni chop etilgan Financial Times gazetasiga bergan intervyusida AQSh energetika vaziri Kris Rayt aytdi.

«Agar yevropaliklar chiziq chizib: «biz Rossiya gazini sotib olmaymiz, Rossiya neftini olmaymiz» desa, bu AQShning yanada tajovuzkor bo‘lishiga (sanksiya kiritishda) ijobiy ta’sir qiladimi? Albatta», — deydi Rayt.

U Rossiya energiya resurslarini Amerika suyultirilgan tabiiy gazi, benzini va boshqa mahsulotlari bilan almashtirishni taklif qildi. Uning so‘zlariga ko‘ra, bu YeIga AQSh bilan savdo kelishuvi shartlarini bajarishga imkon beradi, unga ko‘ra, Yevropa davlatlari 2028 yil oxirigacha AQShning 750 milliard dollarlik energiya resurslarini sotib olishi kerak.