Chililik ayol o‘g‘irlangan qizlarini 45 yildan keyin topdi

Chilida 1979 yilda egizak qizlari o‘g‘irlab ketilgan ayol 45 yildan so‘ng birinchi marta ular bilan uchrashdi. CNN telekanali ularning ta’sirli tarixini so‘zlab berdi.

64 yoshli Mariya Veronika Soto va uning qizlari Mariya Beatris va Adeliya Rouzning ehtiroslarga boy uchrashuvi egizaklar Italiyadan qaytib kelganidan keyin Chilidagi Konsepsion shahri aeroportida bo‘lib o‘tdi.

Soto qizlarini oxirgi marta sakkiz oylik paytida ko‘rgan. Egizaklar o‘zlarini Chilida asrab olinganini doimo bilgan, ammo onasi kimligidan bexabar bo‘lgan.

19 yoshli Sotoning farzandlari 1979 yilda, Chili general Augusto Pinochet diktaturasi ostida bo‘lganida tug‘ilgan. Ayol so‘zlariga ko‘ra, shifokorga rejali tashrifdan so‘ng, unga 8 oylik qizlari tekshiruvdan o‘tish uchun qolishi kerakligi aytilgan. Ularga tibbiy yordam va ovqatlanish bo‘yicha yordam va’da qilingan. Ammo ko‘p o‘tmay, uning so‘zlariga ko‘ra, hukumat klinikasi onasini go‘yoki ularni noto‘g‘ri ovqatlantirganlikda ayblab, bolalarni olib qo‘ygan.

Politsiya ayolga sudga borishni maslahat bergan. U yerda bolalarni italiyalik er-xotin asrab olgani ma’lum bo‘lgan. Keyinchalik Soto qizlarining tug‘ilganlik haqidagi guvohnomalari o‘zgartirilganini va ularda haqiqiy ota-onalaridan hech birining ismi yozilmaganini bilgan.

2020 yilda Soto butun dunyo bo‘ylab noqonuniy asrab olingan bolalarni qidirayotgan «Nos Buscamos» («Bir-birimizni izlayapmiz») nodavlat tashkiloti bilan bog‘langanida, ona va bolalarni birlashtirishning uzoq va mashaqqatli yo‘li boshlandi. Uning asoschisi, bolaligida noqonuniy asrab olingan Konstansa del Rio ayolga DNK testini topshirishni tavsiya qilgan, Soto darhol shunday qildi.

Tashkilot ayolning qizlarini 5 yilda topishga muvaffaq bo‘ldi. Sotoning aytishicha, u bir kun kelib qizlari bilan uchrashish umidini hech qachon yo‘qotmagan, ammo buning uchun 45 yil kutishga majbur bo‘lishini bilmasdi.

10 sentabr kuni egizaklar Italiyadan Chiliga uchib, Konsepsionga qo‘ndi. Soto va qizlarining samimiy uchrashuviga ko‘plab odamlar, jurnalistlar va amaldorlar ham guvoh bo‘ldi.

«Onajoningiz sizlarni har doim izlagan», dedi Soto qizlarini bag‘riga bosib.

Chili rasmiylariga ko‘ra, Pinochet diktaturasi davrida 1973 yildan 1990 yilgacha minglab chaqaloqlar biologik onalaridan o‘g‘irlab ketilgan va asosan AQSh va Yevropadan kelgan juftliklarga asrab olish uchun sotilgan. Chilida ularni «Sukunat bolalari» deb atashadi.

Ba’zi chaqaloqlar zaif, qashshoq va himoyasiz ayollardan tortib olingan. Soto va qizlari bilan sodir bo‘lganidek, farzandlikka olish agentliklariga noqonuniy ravishda sotilgan.

Hozirgi vaqtda Chili hukumati bunday holatlarni aniqlash va aybdorlarni jazoga tortishga harakat qilmoqda. Ammo, ko‘plab hollarda da’vo muddati allaqachon o‘tib ketgan. Boshqa holatlarda chaqaloqlarni o‘g‘irlash ortida turganlar allaqachon vafot etgan.