Ferstappen F1 poygasida Ozarboyjon Gran-prisi g‘olibi bo‘ldi

Bokuda bo‘lib o‘tgan «Formula-1» (F1) poygasida niderlandiyalik sportchi g‘alaba qozondi. Chempionat peshqadami Piastri avariya tufayli poygani yakunlay olmadi.

Foto: Red Bull Content Pool

«Formula-1» chempionatining amaldagi chempioni, Red Bull jamoasi a’zosi Maks Ferstappen Boku shahri trassasida o‘tkazilgan Ozarboyjon Gran-prisi poygasida g‘olib chiqdi.

Bir kun avval saralash bosqichida g‘olib chiqqan Ferstappen «qirollik poygalari»da ketma-ket ikkinchi marta zafar quchdi.

Kuchli uchlikdan, shuningdek, Jorj Rassell («Mersedes») va bu mavsumda birinchi marta shohsupaga ko‘tarilgan Karlos Sayns («Uilyams») joy oldi.

Chempionat yetakchisi Oskar Piastri («Maklaren») «avariya»dan so‘ng poygani erta tark etdi.

«Formula-1» chempionati umumiy jadvalida Oskar Piastri (324 ochko) yetakchilik qilmoqda. Lando Norris (299) ikkinchi, Ferstappen (255 ochko) uchinchi o‘rinni egallab turibdi.

Konstruktorlar kubogida Maklaren (623) yetakchilik qilmoqda, Mersedes (290) ikkinchi, Ferrari (286) uchinchi o‘rindi.

«Formula-1» chempionatida yana 7 ta poyga o‘tkaziladi, navbatdagisi 5 oktyabrda Singapurda bo‘lib o‘tadi.