Rossiya Ukraina armiyasi o‘quv markaziga raketalar bilan zarba berdi

24 sentabr, chorshanba kuni Rossiya qo‘shinlari Ukraina quruqlikdagi qo‘shinlarining o‘quv bo‘linmasiga qo‘shma zarba berdi. Foydalanilgan qurollar orasida ikkita «Iskandar» ballistik raketasi ham bor, deb xabar berdi Ukraina harbiylari Facebookʼda.

Ukraina quruqlikdagi kuchlarining rasmiy sahifasidagi postda aytilishicha, «boshpanaga aniq zarba berish natijasida, ko‘rilgan xavfsizlik choralariga qaramay, shaxsiy tarkibdagi talafotlarning to‘liq oldini olishning imkoni bo‘lmagan». Qurbonlar soni va voqea joyi aniqlashtirilmagan. Ukraina Harbiy-havo kuchlari avvalroq Ukraina Qurolli kuchlarining o‘quv markazlari joylashgan Chernixiv viloyatida raketa va dron hujumlari haqida xabar bergan edi.

«Odamlarning hayoti va sog‘lig‘ini himoya qilish maqsadida o‘quv markazlari, poligonlar va boshqa harbiy obektlarni ishonchli boshpana bilan jihozlash bo‘yicha ishlar davom etmoqda. Bundan tashqari, harbiy xizmatchilarni dushmanning raketa va havo hujumlari vaqtida himoya qilish bo‘yicha qo‘shimcha xavfsizlik choralari ko‘rilmoqda», — deya qo‘shimcha qildi ukrainalik harbiylar.