Infografika: Jidda minorasi dunyodagi eng baland binolar bilan taqqoslandi

Uning balandligi 1000 metrga yetishi kutilmoqda va loyiha Saudiya Arabistoning Vision 2030 milliy strategiyasi doirasida shaharlarini yangilash hamda iqtisodni diversifikatsiya qilishga qaratilgan maqsadlarini ifoda etadi.

Dastlab “Podshohlik minorasi” (Kingdom Tower) nomi bilan tanilgan inshoot 2013 yilda Jidda iqtisodiy shahri (Jeddah Economic City) kabi yirik loyiha doirasida qurila boshlangan — Jiddaning shimolidagi yangi shahar markazi bo‘lib, turar joy kvartallari, biznes va madaniy maskanlarni birlashtiradi.

Moliyaviy va logistik qiyinchiliklar sabab bir necha bor to‘xtab qolganidan keyin qurilish qayta tiklandi. So‘nggi ma’lumotlarga ko‘ra, bino taxminan 70-qavatga yetgan, ishlarni yakunlash 2028 yilga mo‘ljallangan. Bu bosqich zamonaviy me’morchilikning eng ulkan loyihalaridan biri qayta jonlanayotganini anglatadi va u Dubaydagi Burj Xalifani ham soyada qoldirishi mumkin.

Tayyor holatida Jidda minorasi haqiqiy vertikal shaharga aylanadi: unda hashamatli apartamentlar, ofis maydonlari, jahon darajasidagi mehmonxona, kuzatuv maydonchalari va savdo zonalari joylashadi.

Uning chiroyli, aerodinamik silueti va uchburchak asosga ega tuzilishi kuchli shamol yuklamalariga bardosh berish va ichki zo‘riqishlarni kamaytirish uchun mo‘ljallangan — bunday ko‘lamdagi binoga zarur muhandislik echimi.

Innovatsion me’moriy yechimlar va ekologik texnologiyalar minorani yangi avlod osmono‘par binolari uchun barqaror qurilish namunasiga aylantiradi.

Jidda minorasining qurilishi megapolislar orasidagi yangi raqobat davrini boshladi: shaharlar o‘z manzarasini qayta ko‘rib chiqish va investitsiyalarni jalb etishga intilmoqda. Loyiha mintaqaviy trendni ham aks ettiradi: Yaqin Sharq davlatlari kelajak infratuzilmasiga qizg‘in sarmoya kiritib, neftga bog‘liqlikdan chekinishni maqsad qilgan.

Masalan, 2025 yil oktyabr oyida Saudiya Arabistoni qiymati yetti milliard dollarga teng Land Bridge temiryo‘l loyihasini taqdim etdi — u Jidda va Ar-Riyodni bog‘laydi. Bu tashabbus podshohlikning bog‘lanuvchanlik, modernizatsiya va global yetakchilikka intilishini yana bir bor tasdiqlaydi.