O‘zbekiston va Serbiya birinchi xonimlari “Imkon” ixtisoslashtirilgan bog‘chasida bo‘ldi

Ziroat Mirziyoyeva va Tamara Vuchich Toshkent viloyati Qibray tumanidagi reabilitatsiya markaziga ega “Imkon” ko‘p tarmoqli ixtisoslashtirilgan maktabgacha ta’lim muassasasiga tashrif buyurdi. Uchrashuv inklyuziv ta’lim va bolalarni qo‘llab-quvvatlash masalalariga bag‘ishlandi.

Foto: O‘zA

Mehmonlarni muassasa mutaxassislari kutib olib, alohida parvarishga muhtoj bolalarning har tomonlama rivojlanishi uchun yaratilgan shart-sharoitlar bilan tanishtirdi. “Imkon” markazi tarkibida bolalar bog‘chasi, logopedik va psixologik yordam, shuningdek, tibbiy va ijtimoiy reabilitatsiya xizmatlari yo‘lga qo‘yilgan.

Tanishuv davomida Ziroat Mirziyoyeva va Tamara Vuchich bolalar, tarbiyachilar hamda ota-onalar bilan suhbatlashdi. Birinchi xonimlar bunday muassasalar inklyuziv jamiyatni mustahkamlash, bolalarning ta’lim va ijtimoiy hayotga to‘liq jalb etilishida muhim ahamiyatga ega ekanini ta’kidladi.

O‘zbekiston birinchi xonimi inklyuziv ta’limni rivojlantirish — bolalar huquqlarini himoya qilishning ustuvor yo‘nalishlaridan biri ekanini qayd etdi. Serbiya prezidentining rafiqasi esa O‘zbekistonda alohida parvarishga muhtoj bolalarga ko‘rsatilayotgan e’tibor va g‘amxo‘rlikdan katta taassurot olganini bildirib, markaz faoliyatini yuqori baholadi.