Qibrayda taqiqlangan dori vositalari savdosiga chek qo‘yildi

Bosh prokuratura huzuridagi departamentning Qibray tumani bo‘limi hamda boshqa huquqni muhofaza qiluvchi organlar xodimlari hamkorligida o‘tkazilgan tezkor tadbirda mazkur holat fosh etildi.

Ma’lum qilinishicha, muqaddam sudlangan M.M.ning BYD Chazor rusumli avtomashinasi to‘xtatilib, tekshiruvdan o‘tkazilgan. Ko‘zdan kechirish jarayonida avtomashinadagi yo‘lovchi U.M. qora rangli polietilen paketni ko‘chaga tashlab yuborgan vaqtda ushlangan.

Tekshiruv davomida ushbu paket ichida 12 dona yelim idish hamda “zakladka” usulida sotish maqsadida olib kelingan 28 dona oq rangli idishda kuchli ta’sir qiluvchi vositalar borligi aniqlangan.

Shuningdek, avtomashinaning old o‘rindig‘idan 3 dona dori vositasi, 3 dona mobil telefon va 9 dona bank plastik kartasi ashyoviy dalil sifatida olingan.

Mazkur holat yuzasidan Jinoyat kodeksining 251-1-moddasi bilan jinoyat ishi qo‘zg‘atilib, tergov harakatlari olib borilmoqda.