Chorvachilikka subsidiya va imtiyozlar 2030 yilgacha uzaytirildi

PQ–322-son Prezident qaroriga muvofiq, chorvachilik tarmog‘ini qo‘llab-quvvatlash choralari kengaytirildi: nasldor qoramol, qo‘y va echki importiga subsidiyalar 2030 yil 31 dekabrgacha uzaytiriladi. Shuningdek, QQS bo‘yicha yengilliklar, veterinariya ruxsatnomalarini tezlashtirish va yer ijarasi to‘lovlarini bo‘lib-bo‘lib to‘lash mexanizmi joriy etiladi.

Foto: Kun.uz

“Aholini oziq-ovqat mahsulotlari bilan barqaror ta’minlashga doir qo‘shimcha chora-tadbirlar to‘g‘risida”gi PQ–322-son prezident qarori (31.10.2025) bilan chorvachilik sohasi bo‘yicha qo‘llab-quvvatlov choralari belgilandi.

Chorvachilik xo‘jaliklariga xorijdan import qilingan nasldor qoramol, qo‘y va echkilar uchun subsidiya ajratish tartibi 2030 yil 31 dekabrgacha amal qiladi.

2026 yil 1 yanvardan 2030 yil 31 dekabrgacha, nasldor 1 kunlik jo‘jalar importi uchun subsidiya faqat mahalliy ishlab chiqaruvchilardan go‘sht yo‘nalishida xarid qilingan jo‘jalarga ajratiladi.

2026 yil 1 yanvardan 2027 yil yakuniga qadar tirik yirik shoxli qoramol (TIF TN 0102) hamda tirik qo‘y va echkilar (TIF TN 0104) importida:

hisoblangan QQSni 180 kungacha kechiktirib to‘lash mumkin;
to‘langan QQS qonunchilik tartibida qaytarib beriladi (o‘rni qoplanadi).

2026 yil 1 yanvardan veterinariya ruxsatnomasi va sertifikati 2 baravar qisqartirilgan muddatda ko‘rib chiqiladi.

Chorvachilik mahsulotlari ishlab chiqaruvchilari ozuqabop ekinlar yetishtirish uchun elektron auksion orqali yer uchastkalari ijara huquqini sotib olish to‘lovlarini 5 yil davomida teng ulushlarda to‘lash imkoniyatiga ega bo‘ladi.

Tayyorlagan: Отабек Матназаров

#import #chorvachilik #subsidiya