Чорвачиликка субсидия ва имтиёзлар 2030 йилгача узайтирилди

ПҚ–322-сон Президент қарорига мувофиқ, чорвачилик тармоғини қўллаб-қувватлаш чоралари кенгайтирилди: наслдор қорамол, қўй ва эчки импортига субсидиялар 2030 йил 31 декабргача узайтирилади. Шунингдек, ҚҚС бўйича енгилликлар, ветеринария рухсатномаларини тезлаштириш ва ер ижараси тўловларини бўлиб-бўлиб тўлаш механизми жорий этилади.

Фото: Kun.uz

“Аҳолини озиқ-овқат маҳсулотлари билан барқарор таъминлашга доир қўшимча чора-тадбирлар тўғрисида”ги ПҚ–322-сон президент қарори (31.10.2025) билан чорвачилик соҳаси бўйича қўллаб-қувватлов чоралари белгиланди.

Чорвачилик хўжаликларига хориждан импорт қилинган наслдор қорамол, қўй ва эчкилар учун субсидия ажратиш тартиби 2030 йил 31 декабргача амал қилади.

2026 йил 1 январдан 2030 йил 31 декабргача, наслдор 1 кунлик жўжалар импорти учун субсидия фақат маҳаллий ишлаб чиқарувчилардан гўшт йўналишида харид қилинган жўжаларга ажратилади.

2026 йил 1 январдан 2027 йил якунига қадар тирик йирик шохли қорамол (ТИФ ТН 0102) ҳамда тирик қўй ва эчкилар (ТИФ ТН 0104) импортида:

ҳисобланган ҚҚСни 180 кунгача кечиктириб тўлаш мумкин;
тўланган ҚҚС қонунчилик тартибида қайтариб берилади (ўрни қопланади).

2026 йил 1 январдан ветеринария рухсатномаси ва сертификати 2 баравар қисқартирилган муддатда кўриб чиқилади.

Чорвачилик маҳсулотлари ишлаб чиқарувчилари озуқабоп экинлар етиштириш учун электрон аукцион орқали ер участкалари ижара ҳуқуқини сотиб олиш тўловларини 5 йил давомида тенг улушларда тўлаш имкониятига эга бўлади.

Тайёрлаган: Отабек Матназаров

#импорт #чорвачилик #субсидия