AQSh bir sentlik tangalarni zarb qilishni to‘xtatdi

AQSh Moliya vazirligi bir sentlik tangalarni chiqarishni rasman to‘xtatdi - 12 noyabr kuni Filadelfiyadagi zarbxonada AQSh g‘aznachisi Brendon Bich nazorati ostida so‘nggi penni zarb qilindi, deb yozdi CNN. Rasmiylar zarb qilingan so‘nggi nusxalarni kimoshdi savdosida sotishini e’lon qildi.

2025 yil fevral oyida AQSh prezidenti Donald Tramp bir sentlik tangalarni zarb qilishni to‘xtatish bo‘yicha topshiriq berdi, chunki «ular foyda keltirmaydi».

AQSh zarbxonasi ma’lumotlariga ko‘ra, 2024 yilda bir sentni ishlab chiqarish va tarqatish taxminan 3,7 sentga tushgan. So‘nggi yillarda tangalar ishlab chiqarishda ishlatiladigan mis narxining oshishi tufayli penni zarb qilish ikki baravardan ko‘proq qimmatlashdi.

1 sentlik tangalar muomaladan chiqarilmaydi. Hozir AQShda 300 milliardga yaqin penni muomalaga chiqarilgan.

AQShda bir sentlik tangalar 1793 yilda - Filadelfiyadagi zarbxona tashkil etilgan paytdan boshlab chiqarildi, garchi birinchi penni bundan olti yil oldin zarb qilingan bo‘lsa ham.

Penni zarb qilinishi nominal qiymatidan qimmatroq bo‘lgan yagona Amerika tangasi emas. AQSh zarbxonasi ma’lumotlariga ko‘ra, 2024 yilda har bir besh sentlik tangani ishlab chiqarish va tarqatish uchun taxminan 14 sent sarflangan.

O‘tmishda AQSh allaqachon past nominaldagi tangalarni zarb qilishdan voz kechgan, shu jumladan mis narxining oshishi tufayli. AQSh Kongressi 1857 yilda mashhur bo‘lmagan yarim sentlik tangani chiqarishdan bosh tortdi, shuningdek, ishlatiladigan mis miqdorini kamaytirish uchun bir sentlik tanganing hajmini kichraytirdi.