Poroshenko Ukraina hukumatining butun tarkibini iste’foga chiqarishni talab qildi

Ukraina sobiq prezidenti Pyotr Poroshenko "Energoatom" atrofidagi korrupsiya mojarosi bilan bog‘liq ravishda hokimiyatning harakatlarini yetarli emas, deb hisobladi va butun hukumatning iste’fosini talab qildi.

«Bu butun korrupsiyalashgan jamoaviy "Kabmindich" to‘liq tarkibda iste’foga chiqishi kerak», – dedi u 17 noyabr kuni ijtimoiy tarmoqlarda e’lon qilingan videomurojaatida.

Faqat ikki vazir lavozimidan chetlatilganini u profanatsiya deb atadi va "oshkor etilgan yozuvlarda kamida besh amaldorning familiyasi tilga olinganini" qo‘shimcha qildi.

Poroshenko, shuningdek, yangi hukumat koalitsiyasini shakllantirishga erishishga intilmoqda: «Barcha siyosiy kuchlarni birlashtiradigan yangi koalitsiya obro‘-e’tiborga ega mutaxassislardan iborat milliy qutqarish hukumatini shakllantirishi kerak», – dedi u.

U bu qadamlarning maqsadi sifatida jamiyatning hukumatga bo‘lgan ishonchini tiklashni va frontdagi tanqidiy vaziyat tufayli siyosiy vaziyatni beqarorlashuvdan saqlashni ko‘rsatdi.

Sobiq prezident taklifini Oliy Radadagi "Golos" partiyasi fraksiyasi qo‘llab-quvvatladi. Biroq bu tashabbusni, agar unga boshqa fraksiyalar ham qo‘shilmasa, amalga oshirish istiqbollari yo‘q: "Yevropeyskaya solidarnost" ("Yevropa hamjixatligi") Pyotr Poroshenko partiyasi va "Golos" Ukraina parlamentida jami atigi 45 deputatga ega, hukumatga ishonchsizlik votumi masalasini ko‘rib chiqish uchun esa kamida 226 deputatning qo‘llab-quvvatlashi talab etiladi.

Ukraina Milliy korrupsiyaga qarshi byurosi (NABU) va Maxsus korrupsiyaga qarshi prokuratura (SAP) 10 noyabr kuni energetika sohasidagi "Energoatom" davlat kompaniyasi atrofida yirik korrupsiya sxemasi fosh etilgani haqida xabar berdi.

Mojaro markazida Ukraina amaldagi hukumatining bir qator vazirlari, prezidentning ko‘p yillik hamkori Timur Mindich va moliyachi Aleksandr Tsukerman qoldi. Huquqni muhofaza qiluvchi idoralar Mindichning uyida, "Energoatom"da, shuningdek Ukraina adliya vaziri German Galushchenkoning uyida tintuv o‘tkazdi. Mindichning o‘zi esa bunga qisqa vaqt qolgan paytda Ukraina hududini tark etgan.

12 noyabr kuni Vladimir Zelenskiy ikki kun avval o‘z vazifalarini bajarishdan chetlatilgan adliya vaziri German Galushchenko va energetika vaziri Svetlana Grinchukni ishdan bo‘shatishni talab qildi. Zelenskiy bayonotidan so‘ng har ikki vazir deyarli darhol iste’fo to‘g‘risida ariza yozdi.

13 noyabr kuni Zelenskiy Mindich va Tsukermanga nisbatan sanksiyalar joriy etish to‘g‘risidagi farmoyishni imzoladi.