«Neftchi» 24 yillik tanaffusdan keyin O‘zbekiston chempioni bo‘ldi

Bosh murabbiy Vitaliy Levchenko shogirdlari Superliga 29-turida «Qizilqum»ni 4:1 hisobida mag‘lub etib, muddatidan oldin chempionlikni qo‘lga kiritdi. Bu – Farg‘ona klubi tarixidagi oltinchi chempionlik.

Foto: O‘FA

Farg‘onaning «Neftchi» klubi 24 yildan so‘ng yana O‘zbekiston chempioni bo‘ldi. Farg‘onaliklar Superliga 29-turidan o‘rin olgan «Qizilqum»ga qarshi o‘z maydonidagi o‘yinda 4:1 hisobida ishonchli tarzda g‘alaba qozondi.

Mezbonlarning gollariga Alisher Odilov (2), Jamshid Iskanderov va Ibrohimxalil Yo‘ldoshev, mehmonlarning goliga Shohruz Norxonov mualliflik qildi.

Bu natija «Neftchi»ga 64 ochko bilan muddatidan oldin chempionlikni keltirdi. Eng yaqin ta’qibchi – ikkinchi o‘rindagi «Paxtakor» hisobida 59 ochko bor.

Tojikistonlik bosh murabbiy Vitaliy Levchenko uchun «Neftchi»ni shohsupaning yuqori pog‘onasiga olib chiqishga 4 yil kerak bo‘ldi. 2022 yilda mutaxassis farg‘onaliklarni Superligadagi o‘rnini saqlab qolishga ko‘maklashgan edi. 2025 yilda oltin medallarni keltirdi.

«Neftchi» O‘zbekiston chempionatidagi g‘alabalari sonini 6 taga yetkazdi. Bu mutlaq rekordchi «Paxtakor» klubidan keyin ikkinchi ko‘rsatkich. Toshkentliklar 16 marta chempionlik tojini kiygan. Shuningdek, «Bunyodkor» 5 marta, «Lokomotiv» va «Do‘stlik» 2 martadan, MHSK, «Navbahor», «Nasaf» 1 martadan chempion bo‘lgan.

Tayyorlagan: Сардор Юсупов

#Farg‘ona #Superliga #Neftchi