Ozarboyjonda og‘ir ahvolda qolgan o‘zbekistonlik qaytarildi

O‘zbekistonning Ozarboyjondagi elchixonasi diplomatlari xorijda og‘ir hayotiy vaziyatga tushib qolgan vatandoshlarga yordam ko‘rsatishda davom etmoqda, deb xabar bermoqda «Dunyo» Axborot agentligi muxbiri.

Ma’lum qilinishicha, sog‘ligidagi jiddiy muammolar, jumladan, mikroinfarktni boshidan kechirgan fuqaro mamlakat elchixonasiga vatanga qaytish guvohnomasini rasmiylashtirishda amaliy yordam so‘rab murojaat qilgan.

Elchixona ma’lumotlariga ko‘ra, ushbu fuqaro ko‘p yillar davomida Ozarboyjonda zarur hujjatlarni rasmiylashtirmasdan yashab kelgan. Doimiy ko‘chib yurishlar natijasida u shaxsini tasdiqlovchi hujjatini ham yo‘qotgan.

Fuqaroning tibbiy holati, doimiy yashash joyining yo‘qligi va og‘ir moddiy ahvolini inobatga olgan holda, elchixona diplomatlari tomonidan uni shoshilinch ravishda repatriatsiya qilish choralari ko‘rildi. Jumladan, aviachipta sotib olish ham diplomatik muassasa tomonidan tashkil etildi.

Hozirgi kunda fuqaro vatanga muvaffaqiyatli qaytarilgan bo‘lib, tegishli mutasaddi tashkilotlar tomonidan unga barcha zaruriy tibbiy hamda ijtimoiy yordamlar ko‘rsatilmoqda.