Harorat o‘zgarishi Toshkentda havo ifloslanishini kuchaytirdi

2025 yil 27 noyabr kuni soat 09:00 da atmosfera havosi ifloslanishini kuzatuvchi avtomatik stansiyalar ma’lumotlari asosida Toshkent shahri havo sifati baholandi.

Monitoring natijalariga ko‘ra:

• RM10 mayda dispersli zarrachalar miqdori 193,2 mkg/m³ ni tashkil etdi va ruxsat etilgan me’yor — 300 mkg/m³ dan oshmadi;
• RM2,5 mayda dispersli zarrachalar miqdori esa 121,1 mkg/m³ darajada qayd etildi, bu belgilangan me’yor — 60 mkg/m³ dan 2,02 marta yuqori.

Mutaxassislar ta’kidlashicha, ko‘rsatkichlarning keskin oshishiga havo haroratidagi o‘zgarishlar ham katta ta’sir ko‘rsatgan. Haroratning keskin pasayishi yoki ko‘tarilishi natijasida atmosferada inversiya jarayoni yuzaga keladi. Bu holatda havoning pastki qatlamlari “qulflanib” qoladi, oqibatda mayda zarrachalar tarqalmasdan, muayyan balandlikda to‘planib qoladi va ularning konsentratsiyasi oshadi.

Shu munosabat bilan mutaxassislar aholini, ayniqsa, yurak-qon tomir va nafas yo‘llari kasalliklari bo‘lgan shaxslarni havo ifloslanishi yuqori bo‘lgan vaqtlarda ko‘chada uzoq vaqt yurmaslikka, imkoni bo‘lsa niqoblardan foydalanishga hamda bolalar va keksalarni ehtiyot qilishga chaqirmoqda.

Atmosfera havosi holati yuzasidan monitoring ishlari davom ettirilmoqda.