Luvrda mehnat sharoitlarining yomonlashuviga qarshi ish tashlash o‘tkaziladi

Yangi mojaro — suv chiqib ketishi tufayli yuzlab hujjatlar zarar ko‘rgani oshkor bo‘lganidan keyin, dunyoning eng mashhur muzeylaridan biri xodimlari ish tashlash o‘tkazishga qaror qildi. Mehnat sharoitlarining yomonlashuvi va moliyalashtirish yetarli emasligiga qarshi norozilik aksiyasi 15 dekabrdan boshlanadi, deb dushanba, 8 dekabr kuni bir nechta kasaba uyushmalari xabar berdi va xodimlarni muddatsiz ish tashlashga chaqirdi.

Kasaba uyushmalari Luvrda kadrlar yetishmasligi, texnik muammolar va binolarning eskirib ketganiga e’tibor qaratdi. «Kolleksiyalarni himoya qilish, shuningdek xodimlar va tashrif buyuruvchilar xavfsizligi to‘liq darajada ta’minlanmayapti», — deya ma’lum qildi CFDT-Culture kasaba uyushmasi. U 8 dekabr tongida Luvr xodimlarining umumiy yig‘ilishiga boshchilik qildi. Uyushma Fransiya madaniyat vaziri Rashida Datini vaziyatga aralashishga chaqirdi.

Le Monde nashri ma’lumotlariga ko‘ra, xodimlar binoga suv oqib kirishi xavfi borligi haqida rahbariyatni bir necha yildan beri ogohlantirib kelgan. Suvdan zarar ko‘rish holati noyabr oyi oxirida aniqlangan, o‘tgan hafta oxirida esa Luvr bu haqda OAV bergan ma’lumotni tasdiqladi.

Avval La Tribune de l'Art jurnali yozishicha, zarar issiqlik va ventilyatsiya tizimidagi klapan tasodifan ochilishi natijasida yetkazilgan: shu sababli suv misrshunoslik kutubxonasi joylashgan bino shift qismiga o‘tib ketgan.

Luvr direktori o‘rinbosari Fransis Steynbok AFP agentligiga ma’lum qilishicha, suv oqib kirishi natijasida misrshunoslik kutubxonasidagi 300–400 ta hujjat zarar ko‘rgan. Asosan, bu — tarixiy jurnallar va ilmiy hujjatlar, «fransuz madaniy merosining asarlari emas», deb qo‘shimcha qildi u. AFP ta’kidlashicha, Luvrda issiqlik va ventilyatsiya tizimi bir necha oydan beri o‘chirib qo‘yilgan, uni 2026 yilda to‘liq almashtirish rejalashtirilgan.

Luvr ko‘p yillardan beri tuzilmaviy kamchiliklar va ortiqcha to‘lib ketganlik uchun tanqid qilib kelinadi. So‘nggi yillarda binolar suvdan zarar ko‘rgan bir necha holat aniqlangan, ba’zan bu ekspozitsiya zallarining yopilishi va vaqtinchalik ko‘rgazmalarni ko‘chirishga olib kelgan.

Parijdagi muzey oktyabrda yuz bergan shov-shuvli o‘g‘rilikdan va binolarni qo‘riqlashdagi kamchiliklar uchun tanqid qilinganidan so‘ng, uni boshqarish va xavfsizlik masalalari Fransiyada siyosiy bahs mavzusiga aylandi. Xususan, o‘ng populist «Milliy birlashuv» partiyasi fransuz madaniy merosini samaraliroq himoya qilishni talab qilib, hukumatning bu boradagi harakatlarini yetarli emaslikda tanqid qilmoqda.

19 oktyabr kuni kunduzi o‘g‘rilar Parijdagi Luvrga o‘g‘irlangan yuk mashinasiga o‘rnatilgan maxsus narvon orqali chiqib, binodagi oynani kesish uskunalari yordamida buzib kirgan. Jinoyat joyini tark etayotganda ular narvondan tushib, skuterlarga qarab qochish paytida brilliant va zumrad toshlar bilan bezatilgan tojni tushirib yuborgan, ammo yana sakkizta eksponatni olib qochishga ulgurgan.

O‘g‘irlangan ashyolar orasida fransuz malikalari va imperatritsalarining zeb-ziynatlari ham bor. Qimmatbaho buyumlarning umumiy qiymati 88 million yevro deb baholangan. Politsiya haligacha o‘g‘irlangan eksponatlarni topa olmadi, ammo bir necha gumonlanuvchi qo‘lga olingan.