Bo‘stonliqda tog‘da qolib ketgan 3 nafar fuqaroga yordam ko‘rsatildi

Toshkent viloyati FVBBga «112» tizimi orqali Bo‘stonliq tumani Chimyon mahallasida joylashgan Qiziljar tog‘ida uch nafar fuqaro sayr qilish uchun chiqqanidan so‘ng yo‘ldan adashib qolgani va tog‘dan tusholmay qolgani haqida xabar kelib tushdi.

Foto: Videodan kadr

Ma’lum qilinishicha, murojaat kelib tushganidan so‘ng vaziyatga aniqlik kiritish hamda fuqarolar xavfsizligini ta’minlash maqsadida Chimyon qutqaruv otryadidan bir guruh qutqaruvchilar tezkor tarzda voqea joyiga yo‘l olgan. Qutqaruvchilar aytib o‘tilgan manzilga yetib borgach, tog‘ hududida yo‘ldan adashgan fuqarolarni topib, ularning xavfsiz hududga tushishlarida amaliy yordam ko‘rsatgan.

Qayd etilishicha, qutqaruv ishlari davomida fuqarolar xavfsiz yo‘nalish bo‘yicha pastga tushirilgan va ularning salomatligiga zarar yetmagan. Hodisa joyida vaziyat nazoratga olingan.

FVV tomonidan fuqarolarga tog‘li hududlarda sayr qilishda ehtiyotkor bo‘lish, marshrutni oldindan rejalashtirish, havo sharoiti va kun botishi vaqtiga e’tibor qaratish, aloqa vositalarini tayyor holda saqlash hamda zarurat tug‘ilganda «112» yoki «101» raqamlari orqali tezkor xizmatlarga murojaat qilish tavsiya etildi.

Tayyorlagan: Отабек Матназаров

#yordam #Bo‘stonliq #FVB