Quvadagi qazishmalar chog‘ida miloddan oldingi davrga oid devor topildi

O‘zbek-xitoy arxeologlar jamoasi O‘zbekistondagi Quva qadimiy shaharchasining qolgan devorlarining miloddan oldingi III asrdan milodiy X asrgacha bo‘lgan qismini topdilar, deb xabar berdi “Dunyo” AA.

Sinxua agentligining yozishicha, Loyan-Farg‘ona qo‘shma arxeologik ekspeditsiyasi ishtirokchilari ushbu topilma Ipak yo‘lidagi qadimiy shaharning tarixiy rivojlanishini hamda Sharq va G‘arb o‘rtasidagi madaniy almashinuvlarni o‘rganish uchun muhim moddiy dalil, deb hisoblaydi.

110 ming kvadrat metr maydonni egallagan Quva qadimiy shaharchasi xarobalari Farg‘ona vodiysining O‘zbekiston qismida joylashgan. Qadimgi Ipak yo‘lidagi muhim markaz sifatida bu mintaqa Xitoy bilan ikki ming yildan ortiq vaqt davomida uzoq muddatli aloqalarga ega bo‘lgan.

Arxeologlarning dastlabki ma’lumotlariga ko‘ra, bir necha bor qayta qurilgan istehkomlar uzoq vaqt davomida - Parfiya, Dayuan va So‘g‘d davrlaridan tortib Somoniylar davrigacha ishlatilgan.

Xitoy tomonidagi qo‘shma ekspeditsiya rahbari Lyu Binning ta’kidlashicha, devor qurish texnologiyalarining evolyutsiyasi turli davrlarda me’moriy mahorat va qurilish materiallarini tanlash, bunday tanlovlarga potensial madaniy ta’sir va madaniyatning tarqalishini o‘rganish uchun muhim ma’lumotlarni taqdim etadi.

2023 yilda Xenan provinsiyasining Loyan arxeologiya instituti va Farg‘ona davlat universiteti qadimgi Quva shahri xarobalarini arxeologik qazish ishlarini olib borish uchun qo‘shma arxeologik guruh tuzdilar.

Hozirgi kunga qadar xarobalarda saroylar, shahar darvozalari, devorlar, turar-joy binolari, ko‘chalar va hunarmandchilik ustaxonalari kabi yodgorliklar topilgan.

"Kelgusi yilda saroy hududida joylashuv va funksional rayonlashtirishni har tomonlama tushunishni yanada rivojlantirish uchun tizimli qazishmalar rejalashtirilgan", - deb yozadi Sinxua agentligi.