Muhofaza etiladigan hududlarda ozuqa nuqtalari tashkil etilmoqda

Ekologiya va iqlim o‘zgarishi milliy qo‘mitasi tasarrufidagi barcha muhofaza etiladigan tabiiy hududlarda yovvoyi tabiat vakillarining sovuqda ozuqa topishini osonlashtirish maqsadida biotexnik tadbirlar davom ettirilmoqda. Qo‘mita ma’lum qilishicha, havo harorati keskin pasaygan kunlarda mazkur tadbirlar yanada kuchaytiriladi.

Xususan, Yuqori To‘palang milliy tabiat bog‘ining Zavar va Tamshush bo‘limlarida qalin qor yog‘ishi sabab yovvoyi hayvonlar uchun ozuqa topish qiyinlashgan. Shu munosabat bilan hududning belgilangan nuqtalarida turli ozuqa mahsulotlari — dag‘al xashak, arpa va kepak qo‘yib chiqilmoqda.

Qayd etilishicha, ozuqa joylari ekologik talablarga muvofiq tashkil etilib, hayvonot dunyosining qish mavsumini talafotsiz o‘tkazishiga xizmat qiladi.