30 martdan boshlab Toshkentda suv ta’minotida uzilishlar bo‘ladi

Toshkent shahrida 30 martdan 13 maygacha rejali profilaktika-ta’mirlash ishlari sabab ichimlik suvi bosimi pasayadi yoki ayrim hududlarda ta’minot vaqtincha to‘xtatiladi.

Foto: Getty Images

«Toshkent shahar suv ta’minoti» matbuot xizmati ma’lum qilishicha, 2026 yil bahor mavsumiga tayyorgarlik doirasida poytaxtdagi yirik suv o‘tkazgich tarmoqlarida katta hajmli rejali profilaktika va ta’mirlash ishlari olib boriladi.

Shu munosabat bilan, shaharning barcha tumanlarida turli sanalarda ichimlik suvi ta’minotida uzilishlar yoki suv bosimining pasayishi kuzatilishi mumkin.

Jadvalga ko‘ra, ilk uzilishlar 30 mart kuni Uchtepa va Shayxontohur tumanlarining ayrim mahallalarida boshlanadi. Keyingi bosqichlarda Yashnobod, Mirzo Ulug‘bek, Sergeli, Yakkasaroy, Chilonzor, Olmazor, Yunusobod, Bektemir, Mirobod va Yangihayot tumanlarida ham rejali cheklovlar amal qiladi.

Ma’lum qilinishicha, suv ta’minoti vaqtincha to‘xtaydigan hududlarga maxsus suv tashuvchi avtomashinalar yo‘naltiriladi.

Fuqarolar qo‘shimcha ma’lumot olish uchun Markaziy dispetcherlik xizmatiga 1054 qisqa raqami, shuningdek, tumanlararo aloqa telefonlari orqali murojaat qilishi mumkin.