O‘zbekiston xorijdagi kimoshdi savdolaridan mingga yaqin qo‘lyozmani qaytardi

O‘zbekiston Fanlar akademiyasi vitse-prezidenti Bahrom Abduhalimov “Dunyo” AA bilan suhbatda O‘zbekistondagi Islom sivilizatsiyasi markazi faoliyati doirasida erishilgan muhim natijalar haqida so‘z yuritdi.

Uning ta’kidlashicha, markazda qisqa vaqt ichida qator ilmiy ishlanmalar va rekonstruksiya ishlari amalga oshirildi. Xususan, Abu Rayhon Beruniy tomonidan batafsil tasvirlangan globus o‘zbek tadqiqotchilari tomonidan qayta yaratildi.

Shu bilan birga, xorijdagi kimoshdi savdolaridan mingga yaqin qo‘lyozma sotib olinib, O‘zbekistonga qaytarildi. Bu esa xalqning boy tarixiy, ilmiy va madaniy merosini tiklash hamda uni kelajak avlodga yetkazish yo‘lidagi muhim qadam sifatida baholanmoqda.

Bahrom Abduhalimovga ko‘ra, Islom sivilizatsiyasi markazining asosiy vazifasi xalq, ayniqsa, yosh avlodga o‘z tarixi, madaniy merosi va buyuk ajdodlari bilan faxrlanish tuyg‘usini singdirishdan iborat.

Shuningdek, markaz islom dinining asl mohiyati — ma’rifat, tinchlik, bag‘rikenglik, o‘zaro hurmat va hamkorlik g‘oyalarini keng namoyon etishga xizmat qiladigan muhim ilmiy-ma’rifiy maskan sifatida e’tirof etilmoqda.