Buyuk Britaniyada ideal darajada dumaloq tuxum auksionda sotildi

Ta’kidlanishicha, bunday tuxum milliard dona orasidan bitta uchraydi.

Foto: Bearnes Hampton Littlewood Auctioneers

Buyuk Britaniyadagi kimoshdi savdosida juda noyob va ideal darajada dumaloq shaklga ega tovuq tuxumi 550 dollarga sotildi. Bu haqda New York Post xabar berdi.

Savdo tashkilotchilari ushbu tuxumni “milliard donadan bitta” deb atadi. Uni Rojdestvo bayrami arafasida Fenton fermasidan topib olishgan. Ferma ishchisi Elison Grin odamlarning tuxumga pul taklif etishi jarayonini katta hayajon bilan kuzatganini aytdi. Ayol barcha savdo ishtirokchilariga o‘z minnatdorchiligini bildirdi.

Sotuvdan tushgan mablag‘ jinsiy zo‘ravonlik va shafqatsiz munosabat qurbonlarini qo‘llab-quvvatlovchi Devon Rape Crisis xayriya jamg‘armasiga yo‘naltirildi. Noodatiy mahsulotni kim sotib olgani oshkor qilinmadi.

Avvalroq Nyu York hayvonot bog‘i pingvin va jirafalar tomonidan chizilgan rasmlarni kimoshdi savdosiga qo‘yishi haqida xabar berilgandi. To‘plangan mablag‘ hayvonot bog‘i va jonivorlarning ehtiyojlariga sarflanadi.

#Buyuk Britaniya #kimoshdi savdosi #tuxum