Tramp Eronning yangi tinchlik takliflarini rad etdi

AQSh prezidenti Donald Tramp Eronning yangi tinchlik taklifi bilan tanishganini, biroq uni rad etganini ma’lum qildi. Bu haqda u Isroilning Kan News nashri jurnalisti Natan Guttmanga bergan izohida aytdi.

«Men uchun bu noma’qul. Men uni o‘rganib chiqdim, hammasini o‘rganib chiqdim - buni qabul qilib bo‘lmaydi», dedi Tramp jurnalistga telefon orqali.

Oq uy rahbari Truth Social ijtimoiy tarmog‘ida AQSh Eron bilan juda ijobiy muzokaralar olib borayotganini yozdi.

«Vakillarim Eron bilan juda ijobiy muzokaralar olib borayotganidan va bu muzokaralar hamma uchun juda ijobiy natijaga olib kelishi mumkinligidan to‘liq xabardorman», deyiladi xabarda.

Uning so‘zlariga ko‘ra, harbiy operatsiya «juda yaxshi ketmoqda». Shu bilan birga, u avvalroq bombardimonlarni qayta boshlamaslikni afzal ko‘rishini aytgan, biroq bunday imkoniyatni tan olgan. OAV ma’lumotlariga ko‘ra, u Eronni uzoq muddatli qamal qilishni rejalashtirgan.

Shu bilan birga, Eronning SNN telekanali xabariga ko‘ra, Eron Tashqi ishlar vazirligi rasmiy vakili Ismoil Baqoiy AQSh Pokiston tomoniga Eronning 14 banddan iborat taklifiga javob yuborganini va Tehron hozirda uni ko‘rib chiqayotganini aytdi.

Uning qo‘shimcha qilishicha, Tehron va Vashington o‘rtasidagi muzokaralarda Eron yadroviy dasturi mavzusi yo‘q, barcha muhokamalar faqat Yaqin Sharq mintaqasida ikki davlat o‘rtasidagi harbiy mojaroni tugatish bilan bog‘liq.

Eron ommaviy axborot vositalarining xabar berishicha, Tehronning AQSh va Isroil bilan mojaroni tinch yo‘l bilan hal qilish rejasi 14 banddan iborat bo‘lib, Eron foydasiga tovon to‘lash, shuningdek, Ho‘rmuz bo‘g‘ozida «yangi kema mexanizmini» yaratishni o‘z ichiga oladi.

Al Jazeera telekanalining xabar berishicha, Tehron uch bosqichda uzoq muddatli tinchlik o‘rnatish rejasini taklif qilgan. Shunday qilib, birinchi bosqich 30 kun ichida jangovar harakatlarni to‘liq tugatish va hujum qilmaslik to‘g‘risidagi kelishuvni nazarda tutadi. Bu Isroil va Eronning mintaqadagi ittifoqchilariga ham aloqador.

Ikkinchi bosqich uranni boyitishni 15 yilgacha muzlatish va keyinchalik uning darajasini 3,6 foizgacha cheklashni nazarda tutadi. Shu bilan birga, Eronning Fars agentligi bu ma’lumotni rad etdi.

Uchinchi bosqichda esa Eron mintaqaviy qo‘shnilari bilan umumiy xavfsizlik rejimini yaratish bo‘yicha strategik muloqotni boshlashi kerak.