Farg‘onada membranali suv havzasida bir kishi cho‘kib ketdi

Kecha, 3 iyun kuni Farg‘ona viloyati Bog‘dod tumanidagi fermer xo‘jaliklaridan birida inson o‘limi bilan bog‘liq baxtsiz hodisa sodir bo‘ldi.

Ma’lum qilinishicha, membranali qoplama asosida qurilgan suv havzasiga tushib ketgan fuqaro cho‘kib halok bo‘lgan.

Mazkur holatdan so‘ng Favqulodda vaziyatlar vazirligi mutaxassislari membranali qoplamali suv rezervuarlaridan foydalanuvchi fermerlarni xavfsizlik qoidalariga qat’iy rioya qilishga chaqirdi.

Ta’kidlanishicha, bunday suv havzalari atrofi to‘sib qo‘yilishi, ogohlantiruvchi belgilar o‘rnatilishi hamda ularga begonalar va bolalarning yaqinlashishiga yo‘l qo‘yilmasligi lozim.

Mutaxassislarga ko‘ra, xavfsizlik talablariga amal qilmaslik nafaqat fermer xo‘jaligi xodimlari, balki atrofdagi aholi uchun ham jiddiy xavf tug‘dirishi mumkin.