iPhone 18 Pro haqidagi maxfiy hujjatlar sizdirildi

Ma’lumotlarga ko‘ra, ushbu materiallar Appleʼning Hindistondagi pudratchisi — Tata Electronics kompaniyasiga qilingan kiberhujum oqibatida internetga tarqalgan.

Hakerlar guruhi World Leaks kompaniya serverlaridan 200 mingdan ortiq faylni qo‘lga kiritib, ochiq tarmoqqa joylagan. Ular orasida iPhone 18 Proʻning platasi chizmalari, akkumulyator elementlari haqidagi texnik ma’lumotlar va Apple bilan hamkorlik qiluvchi komponent yetkazib beruvchilar ro‘yxati ham bor.

Shuningdek, hakerlar tomonidan tarqatilgan arxivda Tesla, TSMC va Qualcomm kompaniyalariga oid ayrim hujjatlar ham mavjudligi aytilmoqda.

Sizdirilgan videolar avval ijtimoiy tarmoqdagi X platformasida e’lon qilingan. Unda kumush rangli korpusga va uchta kamerali asosiy modulga ega iPhone 18 Pro turli mustahkamlik sinovlaridan o‘tkazilayotgani aks etgan.

Biroq videolar ko‘p o‘tmay o‘chirib tashlangan. Shuningdek, ularni birinchi bo‘lib e’lon qilgan @evleaks akkaunti ham X tomonidan bloklangan.

Mutaxassislar ta’kidlashicha, Apple odatda turli insayderlik ma’lumotlariga nisbatan ochiq munosabat bildirmaydi. Ammo bu galgi sizdirish kompaniya uchun ancha jiddiy hisoblanmoqda. Chunki internetga oddiy mish-mishlar emas, balki haqiqiy texnik hujjatlar chiqib ketgan.

Xususan, ularda smartfonning platasi chiplari, akkumulyator tizimi va Apple odatda maxfiy saqlaydigan ta’minot zanjiri ishtirokchilari haqidagi ma’lumotlar aks etgan.

Tata Electronics kompaniyasi ham kiberhujum sodir bo‘lganini tasdiqladi. Kompaniya vakillarining bildirishicha, hodisadan keyin ichki axborot tizimlariga masofaviy kirish cheklangan, shuningdek, voqeani o‘rganish uchun mustaqil kiberxavfsizlik mutaxassislari jalb etilgan.