iPhone 18 Pro ҳақидаги махфий ҳужжатлар сиздирилди

Apple компаниясининг ҳали расман тақдим этилмаган iPhone 18 Pro смартфонига оид махфий материаллар интернетда тарқалди. Сиздирилган маълумотлар орасида қурилманинг краш-тест видеолари, техник ҳужжатлари, электрон платалар чизмалари ҳамда компонентлар етказиб берувчилари ҳақидаги маълумотлар мавжуд.

Фото: Apple

Маълумотларга кўра, ушбу материаллар Appleʼнинг Ҳиндистондаги пудратчиси — Tata Electronics компаниясига қилинган киберҳужум оқибатида интернетга тарқалган.

Ҳакерлар гуруҳи World Leaks компания серверларидан 200 мингдан ортиқ файлни қўлга киритиб, очиқ тармоққа жойлаган. Улар орасида iPhone 18 Proʼнинг платаси чизмалари, аккумулятор элементлари ҳақидаги техник маълумотлар ва Apple билан ҳамкорлик қилувчи компонент етказиб берувчилар рўйхати ҳам бор.

Шунингдек, ҳакерлар томонидан тарқатилган архивда Tesla, TSMC ва Qualcomm компанияларига оид айрим ҳужжатлар ҳам мавжудлиги айтилмоқда.

Сиздирилган видеолар аввал ижтимоий тармоқдаги X платформасида эълон қилинган. Унда кумуш рангли корпусга ва учта камерали асосий модулга эга iPhone 18 Pro турли мустаҳкамлик синовларидан ўтказилаётгани акс этган.

Бироқ видеолар кўп ўтмай ўчириб ташланган. Шунингдек, уларни биринчи бўлиб эълон қилган @evleaks аккаунти ҳам X томонидан блокланган.

Мутахассислар таъкидлашича, Apple одатда турли инсайдерлик маълумотларига нисбатан очиқ муносабат билдирмайди. Аммо бу галги сиздириш компания учун анча жиддий ҳисобланмоқда. Чунки интернетга оддий миш-мишлар эмас, балки ҳақиқий техник ҳужжатлар чиқиб кетган.

Хусусан, уларда смартфоннинг платаси чиплари, аккумулятор тизими ва Apple одатда махфий сақлайдиган таъминот занжири иштирокчилари ҳақидаги маълумотлар акс этган.

Tata Electronics компанияси ҳам киберҳужум содир бўлганини тасдиқлади. Компания вакилларининг билдиришича, ҳодисадан кейин ички ахборот тизимларига масофавий кириш чекланган, шунингдек, воқеани ўрганиш учун мустақил киберхавфсизлик мутахассислари жалб этилган.