Acer компанияси модулли компьютерни намойиш қилди

Acer компанияси модулли блоклардан йиғилувчи Revo Build Series компьютерини намойиш қилди, деб хабар бермоқда The Verge нашри.

Янги компьютер 2014 йилда намойиш қилинган Razer компаниясининг Project Christine компьютеридан ҳамма қисмлари ҳам мустақил блокларга ажратилмаганлиги билан фарқ қилади. Revo Build’да базавий модуль процессор эмас, балки Windows 10 операцион тизими ўрнатилган, 8 Гб тезкор хотира, учта USB-порт, HDMI-порт ва аудиоразъёмга эга кичик ўлчамдаги тайёр компьютердан иборат. Процессорнинг иккита варианти мавжуд – Intel Celeron ёки Pentium. Блокнинг ўлчамлари эни 12,5 см, узунлиги 12, 5 см ва бўйи 5,6 см ни ташкил қилади.

Модуль архитектурасидан мақсад компьютерни такомиллаштиришни соддалаштиришдан иборат. Қурилманинг имкониятларини кенгайтириш учун базага қўшимча модулларни ўрнатиш етарли бўлади. Улар бир-бирининг устига конструктор деталларига ўхшаб қўйилади. Бу модуллар асосий блокдан кўра кечроқ сотувга чиқарилади, аниқ санаси айтилмаган. Модуллар орасида 500 Гб ли ва 1 Тб ли ташқи хотира, аудиомудоль, гаджетларни симсиз қувватлаш учун док-станция ва видеокартали қўшимча блок бўлади.

Базавий Revo Build Европада октябрдан 200 евро нархдан сотувга чиқарилади. Қурилма илк сотувга чиқариладиган давлатлар орасида Африка ва Яқин Шарқ давлатлари ҳам бор.

Razer’нинг Project Christine компьютери машинани такомиллаштириш учун кенгроқ имкониятларни кўзда тутади, бироқ компания янги қурилманинг сотувга чиқарилиши санасини маълум қилмади.