Украина БМТ Хавфсизлик кенгашида аъзолик қилишни бошлади

Украина 2016 йил 1 январдан БМТ Хавфсизлик кенгашининг расман доимий бўлмаган аъзоси бўлди. Бу ҳақда Украина президенти Пётр Порошенко ўзининг Facebook’даги саҳифасида маълум қилди.

“Бугундан Украинанинг БМТ ХКда аъзолиги бошланади. Биз тинчлик ва адолатнинг баҳосини биламиз! Олдинда дунёнинг хавфсизлиги учун 2 йиллик алоҳида жавобгарлик бор. Украина уни шараф билан ўтайди”, деб айтди Порошенко.

Маълум қилинишича, Украина 2015 йил 15 октябрдаги яширин овоз беришда икки йилга кенгашнинг доимий бўлмаган аъзоси сифатида қабул қилинган. Бу қарорга 129 та етарли овоз шартида 177 та давлат овоз берган.

Украинанинг БМТдаги вакили Владимир Ельченко бўлади.

Украина билан бирга 1 январдан БМТ ХК столи атрофидан Миср, Сенегал, Уругвай ва Япония жой олади.

БМТ Хавфсизлик кенгаши БМТнинг асосий органи бўлиб, ташкилот низомига кўра унга дунёда тинчлик ва халқаро хавфсизликни таъминлаш жавобгарлиги юкланган. Хавфсизлик кенгаши 15 аъзодан ташкил топган.

Кенгашда 5 та давлат (Россия, Хитой, Бирлашган Қироллик, АҚШ ва Франция) доимий асосда тақдим қилинган, қолган 10 аъзо ҳар йили икки йиллик муддатга сайланади. Кенгашнинг ҳар бир аъзоси унда навбати билан бир ойдан алифбо тартибида раислик қилади.