Иордания 47 кишини қатл этган Саудия Арабистонини қўллаб-қувватлашини билдирди

Иордания Саудия Арабистонининг Теҳрондаги элчихонасига уюштирилган ҳужумни кескин қоралади ва 47 кишига нисбатан олий жазо ижро этилган Саудия Арабистонини қўллаб-қувватлашини билдирди. Бу ҳақда Иордания ҳукумати расмий вакили Муҳаммад ал-Муманий маълум қилган.

2 январь, шанба куни Саудия Арабистони ИИВ ўлимга маҳкум қилинган 47 кишининг қатли ижро этилгани ҳақида хабар берган эди.

Шу куни кечаси бу воқеадан норози бўлган эронликлар Теҳрондаги Саудия Арабистони элчихонасига ҳужум уюштиришди.

Эрон ҳукумати бу ҳужумда иштирок этганларнинг 40 нафарга яқинини ҳибсга олган.

"Иордания биродар Саудия Арабистони қироллигининг радикализмга қарши курашини қўллаб-қувватлайди ва Эрон томонидан бу давлатга ўтказилаётган босимга эътироз билан қарайди", дея ал-Муманийнинг сўзларидан иқтибос келтиради Petra агентлиги.

Унинг ҳисоблашича, Саудия Арабистони элчихонасига уюштирилган ҳужум халқаро ҳуқуқнинг қўпол равишда бузилиши ва дипломатик миссиялар хавфсизлиги бўйича келишувга риоя этмасликдир.

Бундан олдинроқ, Баҳрайн ҳам Саудия Арабистони тўғри иш тутгани ҳақидаги баёнот билан чиққанди.

Шайх Нимр ан-Нимр Саудия Арабистони ҳукумати томонидан 2012 йилда мамлакат шарқида ўтказилган норозилик намойиши вақтида қўлга олинган эди. 2014 йилда у мамлакатда тарқоқлик, қиролга бўйсунмаслик ва террорчилик ташкилоти тузганликда айбланиб, ўлим жазосига маҳкум қилинган эди.

2014 йилнинг февраль ойида Саудия Арабистони террорчи ва экстремизмга қарши жиноий жавобгарлик учун жазо чораларини сезиларди даражада кучайтирган эди. Қиролликда террорчи деб тан олинган ташкилотлар рўйхати эълон қилинган.