Қирғизистонда Австралия фуқароси қирғиз миллий таомининг устидан кулгани учун қамоққа олинди

Бишкек аэропортида австралиялик Қумтор олтин кони мутахассиси ўзининг Facebook`даги саҳифасида қирғиз миллий таоми – чучук (қирғизча қази)ни отнинг жинсий аъзосига ўхшатгани сабабли ҳибсга олинди. Хорижлик эълон қилган пост олтин қазиб олиш муассасасида иш ташлашларга сабаб бўлди. Бу ҳақда 3 январь куни K-News хабар берди.

Қирғизистон Тоғ-металлургия касаба уюшмаси вакили Элдор Тожибоевнинг айтишича, жанжалли пост Янги йил арафасида австралиялик Майкл Макфитнинг саҳифасида пайдо бўлган. “Маҳаллий ишчиларнинг оммавий норозилиги ва қўзғалишига чучук таомининг қирғиз халқи томонидан қаттиқ ҳурмат қилиниши сабаб бўлди”, дея қайд этди Тожибоев.

Унинг таъкидлашича, Макфин қирғиз халқининг иззат-нафси ва обрўсини ҳақорат қилди.
Натижада конда иш ташлашлар бошланди, 2 январь куни тунда ишлаб чиқариш тўхтади. Ташкилот ходимлари ишни 3 январь куни эрталаб касаба уюшмалари етакчилари билан бўлиб ўтган музокаралардан сўнг қайта йўлга қўйди.

Макфитнинг ўзи ҳодисадан сўнг конни тарк этган. Якшанба куни у Манас (Бишкек) аэропортида ИИВ ходимлари томонидан қўлга олинган.
Тожибоевнинг маълум қилишича, Макфит томонидан амалга оширилган иш Қирғизистон Жиноят кодексининг 299- моддаси (“Миллий, ирқий, диний ва ҳудудлараро адоватни қўзғатиш”) бўйича жавобгарликка сабаб бўлади. Ушбу моддага кўра, бундай жиноятни содир этган шахс уч йилдан беш йилгача озодликдан маҳрум этилиши мумкин.

The Guardian хабарига кўра, Макфит — британиялик бўлиб, Қумтор олтин конига эгалик қиладиган Канаданинг Centerra Gold компаниясида ишлайди. Нашр маълумотига кўра, хорижлик миллий адоватни қўзғатишда айбланмоқда.

Макфит ўз саҳифасидаги миллий таом танқид қилинган постини ўчирган. “Мен қирғиз халқи ва отнинг жинсий аъзоси ҳақидаги изоҳлар учун узр сўрашни истар эдим. Мен ҳеч кимни ҳақорат қилишни хоҳламагандим ва чин дилдан узр сўрайман”, - дея газета хабаридаги Макфит сўзларидан иқтибос келтирилади.

Чучук (сужух, шужук, чужук, сужук) — турк ва Яқин Шарқ халқларининг миллий таоми бўлиб, Марказий Осиёда асосан от гўшти ва унинг аъзоларидан тайёрланади.