Трамп Ҳиллари Клинтонни “ал-Қоида” матбуот котиби деб атади

АҚШ президентлигига республикачилардан номзод бўлмиш миллиардер Дональд Трамп штабининг вакили MSNBC телеканали эфирида демократларнинг асосий номзоди Ҳиллари Клинтонни “ал-Қоида” матбуот котиби деб атади.

Миллиардернинг вакили Катрина Пирсон “Дональд Трамп ИШИД ва террорчилар нима деб ўйлашидан ташвишда эмас”, деб таъкидлади.

“У биринчи навбатда америкаликлар нима деб ўйлашидан, улар ўзларини ҳимоя қилиш ва олдинга юриш учун нима қилмоқчи эканлигидан ташвишда”, - қўшимча қилди аёл.

Бошловчининг айнан Трампнинг баёнотлари террорчиларга қўл келаётгани ҳақидаги сўзларига жавобан Пирсон хоним Клинтонни “ал-Қоида” билан алоқадорликда айблади.

“Аш-Шабоб” “ал-Қоида”нинг бир қисмидир. Бу ИШИД эмас эди, Ҳиллари Клинтон шундай иддао билан чиққанига қарамай, ОАВ буни Клинтоннинг ғалабаси қилиб кўрсатмоқчи бўлмоқда, аслида эса Клинтон “ал-Қоида”нинг матбуот котибига айланиб қолган кўринади”, - деди у.