Бугун «Олтин тўп» совриндори аниқланади

Бугун Швейцарияниннг Цюрих шаҳридаги Zurich’s Kongresshaus муҳташам саройида 2015 йилнинг яхшилари тақдирланади. Улар қаторида "Олтин тўп" (Ballond'Or) совриндори ҳам мукофотланади.

Ҳозирда бу соврин учун даъвогар уч нафар футболчи қолган: "Барселона" ҳужумчилари Лионель Месси ва Неймар ҳамда "Реал" ҳужумчиси Криштиану Роналду. Месси бу мукофотни 2009-2012 йиллар оралиғида 4 марта қўлга киритган. Роналду эса шу вақтгача 3 марта йилнинг энг яхши футболчиси сифатида тақдирланган.

“Олтин тўп”га номзодларни ФИФА ҳамда France Football журнали ҳамкорликда аниқлайди. Улар 23 фамилиядан иборат рўйхатни тузишади, шундан сўнг овоз бериш бошланади, унда терма жамоаларнинг бош мураббийлари, жамоа сардорлари ва нуфузли спорт журналлари иштирок этади.

Овоз берувчилар 3 нафар энг яхши номзодни танлайди, йил футболчисига маълум бир миқдорда баллар берилади: биринчи ўринга 5 балл, иккинчи ўринга 3 балл ва учинчи ўринга 1 балл. Ҳисоб-китоблардан кейин финалчилар учлиги аниқланади.

Бундан ташқари, маросимда ўтган йилнинг энг яхши мураббийи, ўтган йилнинг энг чиройли голи, ўтган йилнинг энг яхши аёл футболчиси ҳамда йил терма жамоаси эълон қилинади.

Эслатиб ўтамиз, маросим Тошкент вақти билан соат 22.30да бошланади.