Кристиан Бэйл семириши талаб қилингани учун автопойгачи ҳаёти тўғрисидаги фильмда ўйнашдан бош тортди

Голливуд актёри Кристиан Бэйл италиялик конструктор ва автопойгачи Энцо Феррарининг ҳаёти ҳақида ҳикоя қилувчи фильмда суратга тушишдан бош тортди. Мазкур лойиҳани тарк этишга актёрни тезда ортиқча вазн тўплаш зарурлиги сабаб бўлган. Актёр буни соғлиғига зиён етиши мумкин деб ҳисоблади, дея хабар беради Variety.

Нашрнинг хабар қилишича, Бэйлга бунинг учун суратга олиш ишлари бошланадиган 2016 йилнинг баҳоригача бўлган муддат берилган. Актёр айнан қанча миқдорда вазн тўплаши кераклигига ойдинлик киритилмаган. Унинг ўрнини ким эгаллаши ҳам номаълум бўлиб қолмоқда. Фильмга Майкл Манн режиссёрлик қилади. Фильм Италияда тасмага туширилиши кўзда тутилган.

Лойиҳа Брок Йетснинг «Энцо Феррари: Инсон. Автомобиллар. Пойга. Машина» (Enzo Ferrari: The Man, The Cars, The Race, The Machine) ҳикояси асосида дунёга келган. Асарда тадбиркорнинг ҳаёт йўли — автомобил устасидан ўз номи билан аталувчи йирик корхона эгаси бўлгунига қадар босиб ўтилган йўл ҳақида ҳикоя қилинади.

Маълумот учун Бэйл бир неча марта ижро этган роллари учун вазнини ўзгартиришга тўғри келган. Бунга «Машинист» филмидаги ролида 55 килограммгача озгани, «Қора рицарь: Афсонанинг қайта туғилиши» картинасида эса 90 килограммга семиришига тўғри келганини мисол қилиб келтириш мумкин.