«Милан» – «Фиорентина». Боатенг қайтишини гол билан нишонлади

Кейинги икки мавсумни Германиянинг «Шальке» жамоасида ўтказгач, янги йилда ўзининг собиқ жамоаси «Милан»га қайтган ганалик ярим ҳимоячи Кевин-Принс Боатенг А сериянинг 20 турида «Фиорентина»га қарши кечган баҳсда (2:0) майдонга тушди ва голлардан бирига муаллифлик қилди.

У ўйиннинг 88-дақиқасида якуний ҳисобни ўрнатган голни уриб, қайтишини гол билан нишонлади.

Эслатиб ўтамиз, Кевин-Принс Боатенг 2010 йилдан 2013 йилгача ҳам «Милан» сафида ўйнаганди.

«Фиорентина»га қарши ўйинда яна бир эътиборли воқеа рўй берди. 2015 йилнинг сентябрида жароҳат олган ҳужумчи Марио Балотелли майдонга туширилди. У ўйиннинг 87 дақиқасида биринчи гол муаллифи Карлос Баккани алмаштирди.

«Милан» ушбу ғалаба эвазига «Сассуоло» ва «Эмполи»ни ортда қолдириб, 32 очко билан 6-ўринга кўтарилиб олди.

«Фиорентина» эса кетма-кет иккинчи мағлубиятини қабул қилиб олгач, энди пешқадам «Наполи»дан 6 очкога ортда қолмоқда. Флоренцияликлар 4-ўринга тушиб қолишди.