1 январдан тадбиркорлик субъектларини электр тармоқларига улаш тартиби соддалашди

2016 йилнинг 1 январь кунидан бошлаб, тадбиркорлик субъектларини электр тармоқларига улаш тартиби соддалашиб, илгаридек бир қатор тартиб-таомиллардан ўтиш ўрнига, фақат 3 тартиб-таомилдан ўтиши кифоя бўлди. БМТ Тараққиёт дастурининг Kun.uz сайтига тақдим этган пресс-релизида келтирилишича, мазкур янги тартиб-таомил электр тармоқларига уланишни янада осонлаштириб, халқаро тадбиркорлик рейтингларида Ўзбекистоннинг ўрнини яхшилашга ҳам ёрдам беради.

Жаҳон банкининг “Бизнесни юритиш-2016” (Doing Business) рейтингидаги “Электр тармоқларига уланиш” кўрсаткичи бўйича Ўзбекистон 189та мамлакат ичида 112 ўринни эгаллайди. Жаҳон банкининг ҳисобига кўра, айни пайтда электр тармоқларига уланиш учун тадбиркор 7та босқич, хусусан лойиҳалаштириш, ишга тушириш ва созлаш ҳамда мутасадди идораларнинг рухсатини олиш билан боғлиқ бошқа тартиб-таомиллардан иборат экан.

Вазирлар Маҳкамасининг 2015 йилнинг 2 октябрь куни қабул қилинган 280-сонли қарорига биноан, электр тармоқларига уланиш ишларининг аксарияти электр қуввати билан таъминловчи ташкилотлар томонидан амалга оширилади. Шунингдек, ушбу ташкилотларнинг зиммасига лойиҳалаштириш, қурилиш-монтаж, режимни созлаш ва ихтисослаштирилган ташкилотларни субпудрат асосида жалб этиб, бошқа ишларни амалга ошириш билан боғлиқ вазифалар ҳам юклатилган.

Эндиликда объектни электр тармоқларига улаш учун тадбиркор тегишли аризаси ва қонун томонидан тасдиқланган ҳужжатларни “ягона дарча” марказига тақдим этишининг ўзи кифоядир. “Ягона дарча” марказига берилган ариза электр таъминоти ташкилотига йўналтиради. “Ягона дарча” марказида олинган жавоб асосида тадбиркор объектни электр тармоғига улаш тўғрисидаги шартномани тузиш имконига эга бўлади.

БМТТДнинг “Ўзбекистон бизнес-форуми (3-босқич)” лойиҳаси мутахассисларининг дастлабки ҳисобига кўра, тартиб-таомиллар ва ҳужжатлар сони 7дан 3га қисқаргани натижасида электр тармоғига уланиш муддати ҳам 86 кундан 69 кунгача қисқарар экан.
Мазкур янги тартиб тадбиркорлар газ таъминотига уланиши учун ҳам жорий этилиши назарда тутилган.