Норвегияда дунёдаги энг кичик кинотеатр очилди

Норвегиянинг Тромсё шаҳрида дунёдаги энг кичик кинотеатр очилди, деб хабар бермоқда FlashNord нашри. Кинотеатр қайта жиҳозланган газета киоски бўлиб, икки томошабинга мўлжалланган.

Кинозалнинг очилиши Тромсёдаги XXVI халқаро кинофестивал иши бошланишига мослаштирилди. Кинотеатрда ҳар куни биттадан фильм кўриш мумкин. Ташкилотчиларнинг айтишича, ушбу митти кинотеатрдаги товуш ва тасвир оддий кинотеатрдагидан қолишмайди. Фильмларни киномеханик намойиш қилади.

Ушбу кинотеатрдаги яқин кунлардаги барча намойишлар учун чипталар сотиб бўлинди. Бу кинотеатрда кино кўришни истовчилар 500 норвег крони (тахминан 55 доллар) тўлашларига тўғри келди.