Хоккайдода ёлғиз қизалоқ учун юрадиган поезд ҳикояси минглаб туристлар диққатини тортди

Япониянинг Хоккайдо оролида ёлғиз қизалоқ учун юрадиган поезд ҳикояси минглаб туристлар диққатини тортди. Бу ерга кўплаб одамлар ташриф буюра бошлади.

Бир неча йил муқаддам бу воқеа Япония матбуотида кенг ёритилган эди. Маҳаллий темир йўл компанияси йўловчиларнинг йўқлиги туфайли кичик бир станцияни ёпмоқчи бўлган, аммо қишлоқдаги бир қизалоқ мактабга бориш учун поезддан фойдаланишини билиб, ёпиш қарорини уч йилга кечиктирган эди.

Аслида поезддан қиздан бошқа йўловчилар ҳам бўлиши аниқланишига қарамай, ҳикоянинг бирламчи версияси кенг тарқалиб, 2015 йили жаҳон интернетида ҳам оммалашди.

Сюжет шу даражада машҳур бўлиб кетдики, станцияга оммавий тарзда сайёҳлар ташриф буюра бошлади. Айримлар фақат станциянинг ўзини суратга олса, бошқалар қизнинг чиқишини кутиб турарди.

Натижада маҳалий блогер Mint Jam мурожаатнома чоп этиб, унда имтиҳонларга тайёрланаётган қизни тинч қўйишни сўради.