Юнусободда иссиқ сув хизмати ходимларини дўппослаган ака-ука қўлга олинди

Тошкент шаҳрининг Юнусобод туманида иссиқ сув хизмати ходимларини дўппослаган ака-ука қўлга олинди, деб хабар беради “Огоҳ” газетаси.
Айтилишича, “Тошиссиққуввати”да техник инспектор лавозимида ишлаган Меҳриддин Норқобилов ўртоғи Собиржоннинг укаси Жавлонбекни ёрдамчи сифатида бирга олиб юрган.

Бир сафар қарздор хонадонлардан бирига қўнғироқ қилганида, Шаҳло исмли қиз гўшакни кўтарган. У ҳозир қарздорлик ҳақида хат олиб бориб беришини айтиб, тепага кўтарилган. Аммо эшикни Шаҳлонинг акалари Юнусбек ва Сухроббеклар очиб, Меҳриддинни калтаклай бошлашган. Юнусбекнинг қўлида ошпичоқ бўлган.

Меҳриддин зинадан думалаб тушган, сўнг қоча бошлаган. Ака-укалар эса Жавлонбекни гаровга олиб, Меҳриддин келсагина қўйиб юборишларини телефон орқали айтишган.

Воқеа жойига Жавлонбекнинг акаси Собиржон келган ва улар бир амаллаб оғзи-бурни қонга тўлган болани зўравонлар қўлидан қутқариб олишган.
Йигитлар дастлаб шифокорларга,сўнг милицияга мурожаат қилишган. Зўравонлар қўлга олинган.