Москва метросининг 200-станцияси 15 февралда очиладиган бўлди

Москва метросининг Сокольники линиясидаги янги “Саларьево” станцияси 15 февралда очилиши режалаштирилди, деб хабар бермоқда “Москва” агентлиги.

Бу янги станция Москва метросининг 200-станцияси бўлади.

“Саларьево” станциясини 15 февралга очишни мўлжалламоқдамиз. Станция тўлиқ тайёр, ҳужжатларни расмийлаштириш масалаларини ҳал қилиш ва муҳандислик қурилмаларини созлаш ишлари қолди”, деб айтди журналистларга Москва мэрининг шаҳарсозлик сиёсати ва қурилиш масалалари бўйича ўринбосари Марат Хуснуллин.

Сокольники линиясида “Румянцево” ва охирги станция ҳисобланувчи “Саларьево” станцияларининг очилиши Москванинг жануби-ғарбий маъмурий округидаги транспорт юкланишини 20 фоизга камайтиради.

“Саларьево” станцияси яқинида автомобиллар ва ер усти жамоат транспорти учун автотураргоҳни ўз ичига олувчи транспорт-ўтиш тугунини қуриш режалаштирилмоқда. Бу тирбандликлардан қочган ҳолда, метрога қулай ўтиришга имкон беради.

18 январда “Саларьево” станциясига қўшни, Янги Москва ҳудудидаги биринчи метро станцияси ҳисобланган “Румянцево” станцияси очилганди.