Ангела Меркелни миграцион сиёсати учун судга беришмоқчи

Германия канцлери Ангела Меркель ҳукумати миграцион сиёсати туфайли судга тортилиши мумкин. Spiegel газетасида ёзилишича, бир гуруҳ юристлар Германия конституцион судидан Меркелнинг мамлакат чегараларини қочқинлар учун очиб қўйиши мамлакат конституциясига зид экани ҳақида қарор қабул қилишни талаб қилишмоқда. Уларнинг етакчиси Клеменс Антвайлернинг ҳисоблашича, Меркелнинг ҳаракатлари "ўз ваколатлари доирасидан четга чиқиш" ҳисобланади.

ГФР раҳбарининг миграцион сиёсати кейинги вақтларда немис халқининг кескин норозиликларига сабаб бўлмоқда.

"Кёльн воқеалари"дан кейин Ангела Меркелнинг консерватив блоки рейтинги рекорд даражадаги минимумга (32 фоиз) тушиб кетган. Шунингдек, Меркель хоним Германиядаги сиёсатчилар орасидаги шахсий рейтинг бўйича учинчи ўринга тушган: у Молия вазири Вольфганг Шойбле ва Ташқи ишлар вазири Франк-Вальтер Штайнмайердан ортда қолмоқда.

Бундан олдинроқ, Financial Times нашрида Германия канцлери Ангела Меркелнинг Яқин Шарқ ва Шимолий Африкадан келган миллиондан зиёд қочқинларга бошпана бериш қарори немис жамиятида чуқур парчаланишни юзага келтиргани ҳақида ёзилганди.

“Кёльн воқеалари” учун айбнинг бир қисми шаҳар полицияси бошлиғига қўйилиб, у аллақачон истеъфога чиқарилди. Аммо бу ерда муаммонинг Меркель ҳукумати айланиб ўтмоқчи бўлаётган бошқа қирралари ҳам талайгина”, — деб таъкидланганди нашрда.

"Янги йил куни кечасида ҳужум уюштирганларнинг аксарияти Африка ва Яқин Шарқ мамлакатлари фуқаролари бўлганлиги боис, қочқинларнинг немис жамиятига интеграция қилиниши тўғри амалга оширилгани шубҳа остига олинмоқда. Муаммо эса кундан-кун жиддий тус олмоқда, чунки Германиядан бошпана излаётганлар сони камайгани йўқ, аксинча, кундан-кун ортиб бормоқда.

Аммо немис ҳукумати ирқи, миллати ва диний келиб чиқишидин қатъи назар, қочқинлар билан ўртада можаро келиб чиқмаслиги учун содир этилаётган жиноятлар ҳақида оғиз очмаслиги мумкин эмас. Бу каби ҳолат Буюк Британияда ҳам кузатилган эди. Ўшанда Британия ҳукумати икки ўртада миллатчилик муаммолари келиб чиқмаслиги учун покистонлик жиноий уюшмалар томонидан болалар устидан амалга оширилган зўравонликлар тўғрисида оғиз очмасликни афзал кўрганди.

Кёльндаги воқеаларда ҳам худди шундай аҳвол кузатилмоқда: немис полицияси ва мамлакат ОАВи қочқинларга нисбатан салбий фикр уйғотмаслик учун бўлиб ўтган воқеалар ҳақида маълумотларни оз-оз миқдорда бериб боришди.

Токи қочқинларни немис жамиятига интеграция қилиш чоралари кучайтирилмас экан, қочқинлар орасида жиноятлар содир этилиши миқдори камаймас экан, Меркель қўллаётган "очиқ эшиклар" сиёсатининг келажаги бўлмайди, Германия, худди мамлакат канцлери айтмоқчи “яна битта Кёльн воқеасини кўтара олмайди", — деб ёзганди нашр.