Таиландда иккинчи марта MERS вируси билан боғлиқ ҳолат қайд этилди

Таиландда MERS (Яқин Шарқ респиратор синдроми коронавируси) вируси билан боғлиқ иккинчи ҳолат қайд этилди. Бу ҳақда Рейтер агентлиги хабар берган.

Мамлакат соғлиқни сақлаш вазирлигида маълум қилинишича, Бангкокка Омандан келган 71 ёшли шахсда вирус аниқланган.

2015 йилнинг ёзида ҳам Араб давлатларидан биридан келган шахсда ҳам вирус аниқланганди.

Эслатиб ўтамиз, Корея Республикасида 2015 йилнинг май ва июнь ойларида MERS короновируси кенг тарқалди. Натижада бу касаллик туфайли жами 186 киши зарарланиб, улардан 36 нафари ҳаётдан кўз юмган эди.

Яқин Шарқ респиратор синдроми коронавируси — MERS касаллигига илк чалиниш ҳолати Саудия Арабистонида 2012 йилда рўй берган бўлиб, хасталик Яқин Шарқ, Жанубий Корея, Таиланд ва бошқа бир қатор мамлакатларга тарқалди. У эрта босқичларда ҳеч қандай алоҳида аломатларни юзага чиқармайди. Одатда иммунитети суст, сурункали ўпка касалликлари ва буйрак етишмовчилиги мавжуд инсонлар ушбу касалликни осон юқтириб олади. Ҳозирча хасталикка қарши вакцина ишлаб чиқилмаган.