Amazon онлайн-дўкони фойдаланувчиларнинг шахсий маълумотларини эътиборсизлик туфайли ошкор қилишда гумонланмоқда

Amazon онлайн-дўкони мижози Эрик Спрингер ўзининг Medium платформасидаги шахсий блогида онлайн-дўконнинг қўллаб-қувватлаш хизматининг ишонувчанлиги сабабли фирибгарлар унинг шахсий маълумотларини кўп марта билиб олганларини маълум қилди.

Спрингернинг ёзишича, у фирибгарлик ҳақида биринчи марта унга Amazon’дан унинг қўллаб-қувватлаш хизмати билан суҳбати қанчалик фойдали бўлганини баҳолаш илтимоси билан хат келганда билиб қолган. Спрингер қўллаб-қувватлаш хизмати билан боғланмагани сабабли, бу хабарни хатолик туфайли олган деб ҳисоблаган, бироқ қизиқувчанлиги устун келиб, дўкон билан боғланган.

Унга гўёки унинг номидан юборилган хабарнинг нусхасини юборишган. Хабар матнидан аниқланишича, номаълум бир одам ўзини Эрик Спрингер деб таништириб, Спрингер домен номларини рўйхатдан ўтказишда фойдаланган қалбаки манзилни айтган. Бу маълумотлар асосида дўконнинг қўллаб-қувватлаш хизмати ходими унга Спрингернинг ҳақиқий манзили ва телефон рақамини тақдим қилган.

Спрингернинг айтишича, бўлиб ўтган воқеадан кейин у Amazon’дан унинг қайд қилиш ёзувига қўллаб-қувватлаш хизмати ходимлари фирибгарликка уринишлар бўлишидан хабардор бўлишлари ва кираётган мурожаатларга эътиборлироқ бўлишлари ҳақидаги эслатмани қўшиб қўйишни сўраган. Спрингернинг таъкидлашича, ушбу воқеадан кейин унинг маълумотлари яна икки марта ошкор қилинган.

Бироқ Reddit интернет-форумининг бир неча фойдаланувчиси Спрингернинг хабарини ўқишгач, у томонидан баён қилинган фирибгарларнинг мулоқот қилиши схемасини такрорлашга ҳаракат қилишган, бироқ бунинг уддасидан чиқа олишмаган. Улар қалбаки манзилларни айтишгандан кейин, Amazon’да улар тақдим қилган маълумотлар тизимда мавжуд бўлган маълумотлардан фарқ қилиши айтилган ва суҳбатни давом эттиришдан бош тортилган.

Amazon ҳозирча бунга ҳеч қандай изоҳ бермаган.