Канадалик ихтирочи ўзи яратган экзоскелет ёрдамида Mini Cooper‘ни кўтарди

25 январда канадалик ихтирочи Жеймс Хобсон 1,1 тонналик Mini Cooper автомобилини кўтариш учун экзоскелетдан фойдаланаётгани акс этган роликни чоп этди.

Маълумот учун, экзоскелет одамнинг мушаклари кучини ошириш, йўқотилган функцияларни қайта тиклаш ва ташқи каркас ва ҳаракатлантирувчи элементлар ҳисобига ҳаракатлар амплитудасини кенгайтиришга мўлжалланган қурилмадир.

Видеода канадалик яратган экзоскелет тўлиқ автоном ҳолда ишлаётганини кўриш мумкин: унинг орқасида механик оёқлардаги поршенларни ҳаракатга келтирувчи батарея ва мотор жойлашган. Уларнинг ҳолати Хобсон ўнг қўлида ушлаб турган контроллёр ёрдамида созланади.

2014 йилдаёқ Хобсон “Элизиум: Ердаги жаннат” фильмидан илҳомланиб экзоскелетининг илк версиясини яратганди. Ўша конструкция унга қўлларнинг кучини анча кўпайтиришга имкон берарди, у қурилма ёрдамида оғир юкларни, мисол учун 77 кг лик штангани кўтара олган.

Бироқ экзоскелетнинг тепа қисми қанчалик кучли бўлмасин, Хобсон кўтарган бутун юкнинг оғирлиги унинг бутун танасига тўғри келган. Шунинг учун у ўзининг оёқларига куч ва барқарорлик берувчи экзоскелетнинг пастки қисмини яратиш билан шуғулланди.

Хобсон 2015 йилнинг Рождествоси олдидан ўзининг барча асосий ишини ташлаб, барча вақтини тўлиқ экзоскелетни яратишга бағишлади.

Канадаликнинг фикрича, экзоскелетлар дунёсидаги инқилоб аккумуляторлар имкониятини яхшилаш ҳисобига эмас, балки механик устунлик ҳисобига пайдо бўлади.