Apple март ойида iPad Air 3 планшетини намойиш қилади

Жорий йилнинг март ойининг иккинчи ярмида ўтказилиши кутилаётган тақдимотда Apple компанияси нафақат 4 дюймли экранли iPhone 5se смартфонини, балки 9,7-дюймли янги планшетини намойиш қилади. Бу ҳақда 9to5mac со портали хабар бермоқда. Янги планшет iPad Air 3 деб номланиши тахмин қилинмоқда.

Apple компанияси iPad планшетини охирги марта 2014 йил октябрида янгилаган ҳолда iPad Air 2 планшетини намойиш қилганди. Шундан бери компания Apple Pencil стилусига эга катта iPad Pro ва iPad mini 4 планшетларини ишлаб чиқди.
Ўрта форматдаги янги iPad Air 3 планшети ташқи кўриниши борасида ҳойнаҳой тубдан ўзгартирилмайди, бироқ самарадорлиги анчагина ошиши керак.

Баъзи маълумотларга кўра, планшет қоронғида сифатлироқ суратга олиш учун орқа панелида вспишка ҳамда сифатлироқ овоз олиш учун 4 та динамик билан таъминланади. Бундан ташқари, янги планшетнинг синовдан ўтказилаётган прототипларининг экранлари Apple Pencil стилуси билан ишлай олиши айтилмоқда.