Надежда Савченко Украинага қайта олиши учун Россияга жарима тўлади

Россияда судланган украиналик ҳарбий учувчи Надежда Савченко Россия суди томонидан унга чегарани ноқонуний кесиб ўтгани учун солинган 30 минг рубллик жаримани тўлади. Бу ҳақда маҳбуснинг онаси маълум қилди, деб хабар бермоқда РИА “Новости” ахборот агентлиги. Савченко онасининг айтишича, унинг қизига пулларни украиналик консуллар беришган.

Аёлнинг айтишича, унинг қизини жаримани тўлаб беришга адвокати Николай Полозов кўндирган. Адвокат Савченкога "агар жарима тўланмаса, унинг Украинага экстрадиция қилиниши бўйича ҳужжатлар ҳақиқий деб топилмаслиги ҳақида модда борлигини тушунтиргач, Савченко бунга рози бўлган".

Март ойида Ростов вилоятининг Донецк шаҳар суди Надежда Савченкони Донбассда россиялик журналистларнинг ўлимида айбдор деб топиб, 22 йилга озодликдан маҳрум қилганди ҳамда Россия-Украина чегарасини ноқонуний кесиб ўтгани учун 30 минг рубллик жаримага тортганди.